نبيل وجرس الفسحة (نتصرف ازاي؟)
يمكن معظمنا إن مكانش كلنا اتعرض لموقف نبيل وجرس الفسحة أو فكرة إنه شخص جديد ولسه ملوش صحاب، يمكن في وقت الحضانة كان الموضوع سهل لكن بداية من سن ٦ سنين بيكون الموضوع أصعب لأن كل مجموعة من الصحاب مكتفية بنفسها وممكن تقبل أو ترفض أى حد جديد 😌الصداقة شيء مهم جداً فى حياة الطفل طيب يا ترى نتصرف إزاي عشان نساعده؟! 💡
ممكن نقترح عليه ياخد لعبة من ألعابه المفضلة عشان تهون عليه الوقت وميحسش بالوحدة وممكن يتجمع حواليه الأولاد بدافع الفضول، مهم كمان نساعده يمارس نشاطات بيحبها زى الرسم أوالسباحة والجري، ده هيساعده يكون عنده شخصية قوية ويبقى عنده تفاصيل وحكايات مشوقة ومسلية تجذب الأطفال حواليه، لكن أكيد لو الموضوع استمر ممكن نطلب مساعدة المعلّمة بتاعته في الفصل
اتناقشوا معاه 💭
يفضل إننا نتجنب الأسئلة الكتير زي (لاقيت صاحب ولا لسه؟) لأنها هتزعجه وتوتره، لكن ممكن نحكيله عن تجربتنا واحنا في سنه، (وأنا صغير روحت مدرسة جديدة و مكونتش أعرف أى حد، كان إحساس سخيف وصعب وكنت زعلان قوي 😞، لكن في يوم من الأيام الوضع اتغير🌅)
طمنوه وقولوله (احنا متأكدين إن فيه في فصلك ناس لطيفة ودمها خفيف، وفي يوم من الأيام هتبقوا أعز صحاب 👬)، ممكن كمان نحكيله تجربة إيجابية مر بيها، نفكره بأول يوم حضانة أو نادي وقد إيه كان كل الناس بالنسباله غريبة لكن بعد فترة بسيطة اتعلم إزاي يتعرف عليهم ويبقوا صحاب
ممكن كمان بعد ما نحكي القصة نسأله طب لو كنت مكان نبيل كنت هتتصرف إزاي؟
طيب تفتكر نبيل بعد ما يبقى عنده صحاب كتير لو جه حد جديد المدرسة أو الحي بتاعهم هل هيحاول يتعرف عليه ويكون ودود معاه ولا هيتصرف بنفس الطريقة الـ كانت مزعلاه؟
يعني نحاول نوصله إنه ميكونش نسخة من الـ صعبوها عليه 😁
#احكيلي_حدوتة
#نتصرف_ازاي؟!
