ابنك ممكن يكون فنان كبير وممكن رسوماته تبقى مجرد شخابيط عادية، لكن في الحالتين أعماله تستحق التقدير
صندوق الرسومات هو عبارة عن برواز لكن ليه عمق كفاية تخزن فيه رسومات أطفالك وتعرضها بالتوالي بسهولة وشياكة تخلي البيت دافي أكتر وفي نفس الوقت شكله متناسق.

كتير بنعلق أعمال أولادنا الفنية لكن تأطير أعمالهم أكيد ليه تأثير مختلف، كأننا بنقولهم احنا شايفينكم، والرسمة اللي خدت ساعات تستاهل إنها تتعلق، جهدك مقدرينه حتى لو النتيجة مش خارقة، فكرتك ومشاعرك واصلين حتى لو مش عارف لسة تعبر بالكلام، هنعلق الرسمة في برواز جميل زي أي عمل فني بنحبه ووقت ما تحب نغيرها هنبدلها بواحدة تانية، وهنشوف في رسوماتنا إزاي بنكبر ومهاراتنا بتكتر وبتتحسن وكنا مهتمين بإيه من سنة ودلوقتي مهتمين بإيه كأن عندنا كتاب تاريخ خاص بينا احنا بس.

صندوق الرسومات أداة بسيطة بتساعدك تخلي بيتك مساحة مميزة وخاصة، بتتحكموا أنتم في شكلها، مش صور بعيدة عن الواقع مفيش مكان فيها للعفوية وتصرفات أطفالنا اللي محتاجين مساحات يكبروا من خلالها ونفرح بتطورهم ومهاراتهم اللي بتكبر معاهم