القرش غدّار الجبّار 🦈
القرش غدّار الجبّار 🦈
القرش غدّار الجبّار 🦈كان ياما كان في قديم الزمان، ما يحلى الكلام إلا بذكر النبي عليه الصلاة والسلام
كان في قرش صغير اسمه غدّار الجبّار.. كان قوي جداً وعنده عضلات وسنانه حامية وبتلمع زي السكاكين 🔪
كان بيحب ينشر الرعب في مياه المحيط ويجري ورا سرب الأسماك ويتريق على سمكة البهلوان 🐠
وفي يوم وهو بيمضغ الأكل حس إن فى سِنة من أسنانه بتتلخلخ 🦷
يا لهوييى 😲 أسنانى القوية هيحصلها إيه؟!
تخيل إنه هيفقد أسنانه واحدة ورا التانية وبقه هيكون من غير سنان زي الجد العجوز 👨🏽🦳
طب إزاي السِنه دي هتقع؟
هل هينزف دم كتير أو هتوجعه جامد وهي بتقع؟! 😨
جري على مامته وطمنته وشرحتله إن دي من الأسنان اللبنية، هتقع ويطلع بدالها سنة أقوى، سنة قرش كبير وراشد..
ماتقلقش.. مش هتحس بحاجة..
وسنانك الجديدة مش هتقع تاني وهتكون أقوى بكتير، ودلوقتي بقى يلا روح العب!
لكن القرش الصغير كان هيموت من الرعب، كان خايف قوي وبيحلم بكوابيس زي إنه بيصحى من غير سنان ومش بيعرف يدافع عن نفسه، وكانت مامته بتهزر معاه وتقوله ” بقى قرش كبير زيك يسيب سِنة صغيرة تضايقه وتخوفه؟!”
لكن لأول مرة في حياته يحس يعني إيه هَم (الحاجة الصغيرة اللي بتزعجك في أعماق أعماق نفسك ومش بتسيبك في حالك ولو للحظة)
هي صحيح سِنة صغيرة لكن بتمتص
كل قوته!
مبقاش يطارد سرب السمك ولا يتريق على سمكة البهلوان، ابتدى يخس ويضعف، ولما كانت مامته بتطمن عليه كان بيقولها أنا مهموم وقلقان، كانت بتضحك من كلامة وتقولوا “أنت تعرف إيه عن الهم، دي حاجة تخص أسماك القرش الكبيرة، الهم هو إنك ماتلاقيش حاجة تاكلها ولا حتى سمكة صغيرة! أو تبقى بتهرب من بندقية الصيادين، الهم أكبر بكتير من أن سنتك اللبنيه تقع!
مردش عليها وقتها لكن قعد يفكر في سره.. أكيد الكلام دا مش صح كل واحد عنده الهم بتاعه حتى الصغيرين اللي زينا،، زي مثلا لما بيجيلهم مغص في بطنهم و يفضلوا يعيطوا ومبيبقوش عارفين هيخفوا إمتى
وفي يوم من الأيام.. وقعت سنة غدار و هو بيعطس ومحسش بأي ألم، فدفنها في الرملة، وقتها كانت السنة الجديدة ابتدت تطلع ولاحظ إنها أقوى وأكبر وبعد فترة، ابتدى يشيل هم حاجات تانية زي الخوف من بنادق الصيادين أو الدوامات وحاجات تانية كتير..
لكن فضل دايماً يفتكر همّه الأول ويقول لنفسه اصبر يا غدار.. كل اللي مخوفك هينتهي ويقع زي سنتك اللبنية وبعدها تدفنه في الرملة، كان دايما بيقول لنفسه، الهموم بتروح وبتيجي مفيش حاجة بتستمر للأبد، ومش معقول هم صغير زي ده يقدر ياكل قرش كبير زيي.. 🦈💪🏼
#احكيلي_حدوتة
