الـ هو ملوش أي علاقة بركن الوحشين او الـ naughty-corner الـ احنا عارفينه 😈😅

الخطوات أوالشرح:

* البشر بيتصرفوا أحسن لما بيحسوا أنهم أحسن، الركن دا بيساعدنا نهدى ونشعر بتحسن.

* اعمل مع طفلك ركن خاص بيه وخليه يفكر في شكله ويحط فيه حاجات تهديه.

* خلي طفلك يسمي الركن بتاعه زي ما يحب

* لما يكون متضايق اسأله تحب تروح الركن بتاعك؟

* اعمل انت كمان ركن لنفسك ولما تغضب روح اقعد فيه علشان طفلك يتعلم الفكرة

* الركن دا ممكن يكون زاوية، كرسي، أو تحت السرير، ورا الستارة.. 

#تخيل لما تتعصب تلاقي حد بيزعق وبيقولك تقعد في مكان معين مخصص للوحشين لأن محدش عايز يشوفك ولازم تعترف بغلطك الأول ولو اعترضت أو دافعت عن نفسك الوقت هيتضاعف

هل في النهاية هتقول شكراً شجعتني قوي وهقوم احسن من نفسي دلوقتي!

في ناس كتير بتعترض علي النوع دة من التشبيهات، لكن الحقيقة ان استجاباتنا الشعورية واحدة، أي انسان طبيعي لو حد زعقله أو ضغط عليه هيحس بإحساس مش مريح

عشان كدة لما بنحاول نحط نفسنا مكان الطفل احنا بنحاول نحس بيه فعلاً لأن مفيش فرق بين مشاعرنا ك بشر صغيرين أو كبار! ولو في فرق فهيكون إن الأطفال جهازها العصبي أضعف مننا وخبراتها اقل ف هيكونوا بيتأثروا بالحاجة أكتر بكتير ومعندهمش تفكير منطقي ف بيحسوا بالقهر والظلم أكتر بكتير مننا 

 ركن الوحشين بيخلى استجابة الأطفال أسرع لأنهم خايفين من العقاب ومش عايزين يحسوا أنهم مسجونين أو منبوذين، لكن الحقيقة لو مفيش حد كبير موجود غالباً الغلط هيتكرر لأنهم حاولوا يتجنبوا العقاب مش يلاقوا حل

الأداة دي مش لحل المشكلة، هي بس بتساعد الطفل يهدا وممكن بعد كدة نستعمل معاه أي أداه تانيه زي أداة أسئله الفضول مثلا أوالأختيارات المتعددة أو الخطوات الصغيرة

حاجات ممكن تساعد:

1 الأداة دي ممكن نستعملها من ٣ أو ٤ سنين، لو حسيتي ان الطفل مش قادر يفهم الفكرة خليه يشوفك وانت بتعملي الركن قدامه (خلايا المرايا mirror neurons)

2 لو مراهق أو طفل رافض الفكرة الأفضل تعمليها لنفسك و تعرضيها عليه وانك موجودة لو عايز يعملها أو محتاج مساعدة

3 وقت الغضب بعد تعريف المشاعر اعرضي على طفلك تحب تروح الركن بتاعك ولا نروح مع بعض؟ 

4 الطفل رفض أو كان في حالة غضب شديد يكفي انك تقوليله تمام انا هروح المكان بتاعي عشان محتاجة أهدى، و متحاوليش تضغطي عليه أو تتحايلي 

5 لو طفلك استجاب وراح اوعي تبوظي ده بإنك تكافئيه بهديه أو حافز ، خلي دايما الأدوات تبني حاجة جوة الطفل لنفسه مش عشان الحافز أو الهدية

6 ممكن من وقت للتاني تسأليه اخبار ركنك ايه؟ حسيت بإيه جوه، أو تحكيله انت كمان عن ركنك

7 ممكن من وقت للتاني تجددوا فيه وتشوفوا ايه بيساعدكم تهدوا وايه مش مؤثر وتبدلوه بحاجة تانيه

8 متقتحميش ركن الطفل وهو جوة غير لو سمحلك

9 مش لازم بعد كل نوبة غضب بعد ما الطفل يهدي نحلل أو نحاول نحل الموقف

ربنا يعينكم على تربية أطفالكم☺️

دُمتم بخير وسلام ☺️🌷🙏🏻