الأداة الرابعة: خطوات الصغيرة
الأداة الرابعة: خطوات الصغيرة
تصغير المهام بيخلي الطفل يدوق طعم النجاح
الخطوات:
* صغري المهمة لخطوات صغيرة
* اشتغلي مع طفلك علي أول خطوة
* علميه المهارة لكن متعمليش انت المهمة
* الطفل بيستغنى عن اعتقاده انه مش بيعرف لما ينجع في خطوات صغيرة
* الأداة بتساعدك تسهلي المهمة على الطفل بدل ما تقنعيه انها سهلة
أمثلة:
لو بنتك مصرة على طقم معين ومش بتغيرة، ممكن تقترحي عليها تغير التوكة، أو الشراب أو الغويشة
أو الطفل الـ دايماً بيخاف ياخد دش أو بيخاف من المية، ممكن نبتدي بخطوات صغيرة زي اننا نفتح الميه و نخليه يلمسها أو نسأله تحب تاخذ معاك البطة ولا السمكة؟
أو لو مثلًا الأوضة متبهدله علي الآخر وكلها لعب، بدل ما نقول وضب اوضتك حالاً نسأله، تقدر توضب السرير في قد ايه؟ طب هتشيل المكعبات الأول ولا العربيات وهكذا يعني ببساطة بنقسم الخطوات وكمان بنستخدم أسئلة الفضول والاختيارات المحددة
أهمية الأداة دي أنها بتحمي الطفل من أننا نيجي عليه بدول قصد أو نخليه يتراجع عن حاجات كان بيعرف يعملها عادي لكن دلوقتي شايفها صعبة وكبيرة لمجرد انه حصله احباط من موقف مننا (زي اننا نقول مثلا ان الحاجة سهلة وأن كل الأطفال الـ في سنة بيعرفوا يعملوها ودا بيحسسه ان العيب فيه و بيزود المشكلة وكمان بيحصل كتير في فترة المراهقة
الأداة دي كمان بتعلم الطفل أن لما يٌحبط يعمل الـ يقدر عليه ميرميش المهمه كلها ودا كمان احنا الكبار ساعات بنتعرض له
يعني لو بوظنا يوم من الدايت منٌحبطش ونبوظه كله أو لو محتاجين نروق الشقة منقولش يا ننضف البيت كله يا بلاش بالعكس نقسم الخطوات علينا و ننجز الـ نقدر عليه
حاجات ممكن تساعد:
١-ابدأي كلامك على طول بالسؤال عن الخطوة الأولي في المهمة وكأن مفيش غيرها (ونتجنب استخدام الأداة كأن الطفل خذلك، يعني منقولش ايه دا انت مش عارف تلبس الجزمة، طب البس واحدة علي الأقل يبقى اسمكعملت حاجة)
٢- لو اتشجع فجأة وادى لنفسه مهمة كبيرة خلي رد فعلك بسيط
٣- لاحظي أي خطوة صغيرة يعملها وشجعيه عليها بشكل متزن ( ايه دا فعلا قدرت تلبس الجاكيت، ياه فعلا انت حليتها صح )
٤- نحاول نجرب الأداة في المواقف الـ احنا حاسين انها هتنجح فعلاً و منجربهاش مع حاجات صعبه بيعملها ف حياته لأول مرة عشان يتطمن و يثق في نفسة
٥- لما طفلك يقول على حاجة صعبة متقوليش لا دي سهلة 😅 فكري في أول خطوة فيها واسأليه عليها علي طول
نتمني تكونوا استفدوا ^_^
دُمتم بخير وسلام ☺️🌷🙏🏻
