Less toys… More joy ألعاب -بعدد- أقل لمرح أكثر
عارف مشهد غرفة الأطفال المليانة لعب عالأرض؟
المكعبات والدمى والمسدسات والعربيات والبلي متوزعين حوالين الطفل
ده مشهد مألوف تقريبا في أغلب البيوت
والآباء بيتضايقوا من الفوضى بس معلش أطفال هنعمل إيه!
عاوزين نقول لكم إن الأطفال نفسهم بيحسوا بالملل من المنظر ده
اه مسموح بمنطقة إبداعية للعب، لكن مع وجود قوانين بسيطة…
مش معنى إن الألعاب كتيرة ومتوفرة إنهم هييلعبوا براحتهم
لأن الطفل بيتشتت باختيارات كتير، وغالبًا بيقرر ما يلعبش! إلا لوقت صغير جداً
فيه كذا حل لده، عشان طفلك يستمتع باللعب ويقضي وقت أطول فيه ويستفاد منه
1) قلل الألعاب اللي الطفل بيشوفها في محيطه (في غرفة الألعاب أو المعيشة مثلا)
واعمل جدول تناوب للعب: يعني تخبّي بعض الألعاب كام يوم أو أسبوع، وتُظهر مجموعة تانية
وممكن تخلي لعبتين تلاتة حواليه بشكل دائم، (بعض المكعبات أو الألغاز أو الدمى)
2) اتخلّص من الألعاب المملة لطفلك
إما لأنه اعتادها أو لكونها بقت أصغر من سِنّه..
بمشاركتها مع حد من أقربائك أو جيرانك أو أصدقائك
وكمان الألعاب المكسورة أو غير المكتملة (لفقدان بعض أجزائها)… تخلّص منها أول بأول بالطريقة المناسبة
3) نظّم الألعاب المفضلة بالنسباله (حسب موضوعات أو تصنيفات)
في أدراج صغيرة شفافة بدل من تكويمها في سلال وصناديق…
بحيث تبقى واضحة ويقدر يختار بسهولة، مش ياخد الظاهر على السطح وخلاص
4) قلل من شراء اللعب، واختارها بعناية
لأنها مصممة لتكون أدوات للترفيه، مش للتدليل!
5) وعلّمه بالتشجيع والتدريب إنه يرجّع كل لعبة في مكانها بعد اللعب بيها
عشان تساعدوه ويساعدكم في التخلص من الفوضى، وتعلُّم الترتيب والحفاظ على السلامة وراحة العين.
عدد قليل من الألعاب حوالين الطفل، بيوفر لهم ساعات من الترفيه والاستمتاع باللعب.
مين هيجرّب ويقول لنا النتيجة؟
