إزاي عملنا متجرنا بتكلفة أقل من 13 دولار
من أول يوم بدأنا فيه كنا عارفين إن مشروعنا معتمد على البيع اونلاين بشكل أساسي. كنا محتاجين نعمل متجر اونلاين، وجالنا عروض من أشخاص لتنفيذ متجر من 600 لـ 6000 ج.
احنا في الأول خالص كان أقل رقم في الاتنين دوول بنفكر فيه بحرص وهل مهم نستثمره؟ زي كتير من المشاريع الناشئة بيكون أحد تحدياتها هو محدودية الميزانية، أو محاولة توفيرها قدر الإمكان في المراحل الأولى.
طيب هيطلع شكله عامل إزاي وكفائته عاملة إزاي! خصوصاً إننا لسه في الأول وشغالين بنبيع بالفعل من خلال فيسبوك وانستاجرام.
عملنا المتجر الخاص بينا بنفسنا، واللي بنستقبل عليه طلبات الشراء دلوقتي، وكلفنا بالكامل لحد ماوصلنا للمرحلة دي، أقل من 200 ج. طبعاً تكلفة وقتنا مش محسوبه، هنا، لكن هو اتعمل في أسبوعين، خصصنا له 3 ساعات عمل على مدار 12 يوم.
هنقولكم تجربتنا بتفاصيل عملية وببساطة…
أول حاجة حجزنا اسم الموقع domain name في فترة تخفيضات الـ black friday في أمريكا وأروبا اللي بيحصل فيها خصومات بتوصل لـ 90%، فاحنا جبنا اسم الموقع حرفيا بـ 60 جنيه مصري من name cheap بدل من 14 دولار أو حوالي 225 ج.
الاستضافة server host هي اللي ملحقناش نحجزها وإن كان بعضها في العادي سعره معقول زي عند blue host وغيره من سيرفرات الاستضافة اللي بأسعار قليلة نسبياً، فحجزنا استضافة مجانية من مواقع زي freehosting وfreehostia وجربنا الاتنين بس نقلنا على واحد منهم لأسباب فنية مش مهمة أوي، هم بيوفروا مساحة قليلة نسبيا لاستضافة الموقع مجاناً مع دعم فني 24 ساعة، وبعضهم بيوفر مساحة معقولة جداً، وده معناه إننا وفرنا حوالي 36 دولار سنوياً، يعني تقريبا وفرنا لمشروعنا الناشيء أكتر من 500 ج في استضافة الموقع في أول سنة.
أما نظام تصميم وتنفيذ محتوى الموقع cms اللي استخدمناه وهو wordpress مدمج معاه نظام البيع اونلاين woocommerce كان بيتباع بـ 60 دولار في العادي يعني حوالي 700 ج، لكن هو كان جالنا هدية من أحد الشركات الصديقة اللي اشترته وما استخدمتهوش غير مرة واحدة، فشاركته معانا مجاناً، لكن في أوقات الخصم للـ black friday هيكون الـ theme ده بحوالي 10 دولار يعني 160 ج أو أقل.
خطوات تركيب الـ theme وإضافة المحتوى وبناء الويبسايت كانت سهلة وممتعة لأن معاه plugins لطيفة اسمها WPBakery page builder أو Visual Composer وفيه شبهها من الإضافات الاحترافية زي templetera أو Elementor بيبنوا الموقع بسهولة بدون حاجة للكود البرمجي، وبشوية فيديوهات تعليمية للأساسيات وبحث اونلاين ودعم فني كنا بنفهم التحديات التقنية اللي بتقابلنا ونحلها.
مع العلم برضو إن عندنا know how كويسة في المساحة دي وإلا مكناش اختصرنا الطريق بالشكل ده، بس برضو لو حد مبتديء هعرف يتعامل، ممكن يتكلف وقت أكتر بس.
بدأنا نفهم الـ WooCommerce store بيشتغل إزاي ونضيف المنتجات والأسعار وكمية المخزون المتاحة، واختبرنا الموقع مع عملاء فعليين وكل ما بتقابلنا حاجة جديدة بنضيفها أو بنحسنها، وشغال معانا كويس لحد دلوقتي.
بنطمح إننا نعمل متجر shopify وعارفين إن هو من أفضل الأدوات في السوق لسهولة البيع اونلاين. لكن دي كانت خطواتنا الأولى لاختبار فكرة المتجر ومعرفة تحدياته والبيع من خلاله. شوبيفاي أقل باقة فيه بـ 29 دولار شهرياً يعني 500 ج تقريبا، فهندفع 6000 سنوياً. احنا وفرناهم في السنة الأولى من انطلاقة مشروعنا لحد ما نفهم أكتر عن طبيعة المتجر واحتياجتنا الفعلية منه.
ياريت تشاركونا تجربتكم وتقولوا لنا رأيكم في الموقع.
