لما حد من عملائنا أو زوارنا بيسألونا على واحدة من الألعاب الخشبية (مثلث بيكلر Pickler triangle) اللي بيتوقعوا يلاقوه عندنا بما إننا بنصنع ألعاب والدورف ومنتسوري (فلسفات تعليم للطفولة المبكرة بتستخدم أدوات من الطبيعة)، بنقول لهم هي مش متوفرة عندنا لكن ممكن تلاقوها عند الأماكن الفلانية “المنافسين لينا”.

أغلب إن مكانش كل دراسات التسويق الحديث مش بتشجع أبداً على عمل أي نوع من الدعاية لمنافسك. لكن الموضوع له أسباب كتير، من أهمهم إننا كأشخاص مش بنحب ندخل محل ومانلاقيش حاجتنا ولما نسأل البائع: (طيب ممكن نلاقيها فين؟) يكون الرد (لأ ماعرفش أو صعب تلاقيها أوهتلاقيها في أماكن تانية بس بجودة أقل) أو أي رد تاني كمحاولة للهروب من الإجابة، ودي حاجة بتضايق المشتري خصوصاً لو البائع عنده المعلومة؛ واحنا ماحبيناش نكون النوع ده من البائعين.

ولأننا مهتمين بتجربة العميل والزائر، قررنا إننا نركن القاعدة التسويقية دي على جنب ونقول للناس على الأماكن اللي ممكن يلاقوا عندهم الحاجة اللي بيدوروا عليها ومش لاقينها عندنا، حتى لو هيلاقوا عند المنافس ألعاب تانية احنا بنبيعها وموجودة عندهم بأسعار أقل. لأننا عارفين احنا متميزين في إيه وبنكسب بيه.

كمان لأن المعلومات كتيرة جداً في العصر الحالي بل ومتناثرة، فغالبا مش كل الناس بتقدر تبحث وتوصل بسهولة للأماكن اللي تلاقي فيها حاجتها، فجزء من خلق علاقة جيدة مع كل حد بيزورنا هو إننا نكون أشبه بقاعدة معلومات للآباء والأمهات لو احتاجوا ألعاب خشبية ونقدر نساعدهم حتى بمعلومة، لو مش هنقدر نوفر لهم المنتج.

ونتمنى ده يكون صحي لسوق الألعاب ومستلزمات الأطفال في مصر والبلاد العربية. إيه رأيكم؟