Wooden toys, handmade with love! ألعاب خشبية مصنوعة يدوياً بحُب
عارف لما بتاكل في البيت أكل والدتك أو من إيد حد بتحبه… بيكون له طعم مختلف عن لما تاكل برّا!
(الطبخ) مهارة يدوية مازالت مستمرة وبتثبت أصالتها واحتياجنا ليها كل يوم…
الأم بتعملها بلا كلل، بتخصص من يومها ساعات في حاجة هناكلها بس في نص ساعة
وهي بتعملها بتقدّم فيها معنى الحُب: “عشان أضمن لهم أكل صحي وأسعدهم”.
واسألوها عن الإحساس بالمتعة لما بتقدم الأكل ده لأسرتها وياكلوه، ويشكروها عليه!
ولما بيتعمل لك إنت مخصوص، بتحس كمان إن له طعم ونكهة مميزة.
المنتجات المشغولة يدويًا، ليها نفس روح الطبخ من الأم أو الزوجة لبيتها؛ معمولة باهتمام قطعة قطعة
مش مجرد اسطمبة ثابتة على مكن بيطلع منها آلاف القطع في ساعة، ومش مهم هتروح لمين!
لما بنعمل عدد محدود من القطع على إيدينا، بتاخد مننا وقت ومجهود واهتمام
واحنا عارفين إنها هتوصل لحد هيقدّر قيمة الجهد والوقت المبذولين…
فبيكون فيها نفس روح الطبخ للأهل، مع الحُب والاهتمام
تخيّل بقى لما نصنعها واحنا عارفين إنها رايحة لأطفال!
في الصنع اليدوي للألعاب الخشبية، احنا بننفّذ عمليات التصنيع بالكامل تحت إيدينا وإشرافنا…
من أول البحث عن الفكرة المناسبة -اللي هي أشبه بالسؤال اليومي المحيّر: “تاكلوا إيه النهاردة؟”-
مرورًا بشراء المواد الخام وتشكيلها وتجميعها، وتحسين الجودة والاهتمام بالأمان وإضافة اللمسات الفنية والإبداعية اللي تبسط الطفل…
كل عنصر منهم عامل زي النَفَس في الأكل والخلطة والتوابل وطريقة الطهي والتقديم اللي توصّلنا لأحسن قطعة ألعاب تتقدم لأطفالنا.
ده غير إن الصنع اليدوي بيتيح لينا نغيّر في (شكل/تصميم/ألوان) المنتج حسب رغبة مستخدمه.
عشان كده أهم ما يميز الألعاب الخشبية المصنوعة في ألواح ودُسُر، هو إنها مصنوعة مخصوص لطفلك بكل الحُب.
