Real toys to enhance child’s personality ألعاب حقيقية تصقل شخصية الطفل
ليه أغلب ألعاب المنتسوري ووالدورف مصنوعة من الخشب؟
نظريات التعليم اللي أسسها كل من “مارية منتسوري Montessori” و”رادولف شتينير” (تعليم والدورف Waldorf Education) خرجت بنتيجة مفادها إن الخامات الطبيعية والأصيلة بتساعد على نمو الطفل من أكتر من جانب (حسّيًا وعقليًا وجسمانيًا واجتماعيًا…)
إزاي؟
فلسفة منتسوري بتختصرها جملة:
“Real toys, Mostly wood, Not too many.”
“ألعاب طبيعية خام، من الخشب غالبًا، ليست بالكثيرة جدًا.”
يعني إيه اللعبة تكون طبيعية أو أصيلة، أو زي ما أشارت منتسوري (Real)!
مصطلح
Real
مقصود بيه عند منتسوري كذا معنى في بعض…
* إن اللعبة تكون مصنوعة من خامة طبيعية، “منتسوري” حددتها بالخشب، إنما “والدورف” وسّعها لتشمل كل خامات الطبيعة زي الأقطان والأصواف والحرير والصخور… بشرط إنها تكون صحية وآمنة للأطفال…
لأن رغبة الأطفال في الاستكشاف بتدعوهم لتمريرها على الفم أو اللسان أو الأنف، فكانت الخامة الطبيعية آمنة أكتر من المُصنعة من البتروكيماويات (زي البلاستيك)، وكل ما الطفل استكشف اللعبة بحواس غير الإيد والعين، كل ما ده بيحسّن نمو باقي حواسه ووظائفه الجسمانية.
* ولأن كل ما الطفل -خاصةً في المراحل العمرية الأولى- بيتعرّض لخامات الطبيعة ويتفاعل معاها على مستوى صغير (زي الألعاب)، كل ما إدراكه أصبح أوسع وحالته النفسية أحسن ومخاوفه أقل، لأنه عرف أكتر عن الطبيعة اللي بيعيش فيها، وبقى عنده حصيلة معرفية أعلى من طفل لم يتعرّض للخامات دي قبل كده.
* وكمان لأن الألعاب من مواد الطبيعة غالبا بتكون خام وبسيطة وأقرب لطبيعتها الأصلية، بدون عمليات تصنيع كتيرة، يادوب بنضيف أجزاء متحركة بسيطة زي العجلات والحبال… ده بيدعم اللعب المفتوح واللعب التخيلي أو الدرامي pretend & imaginative play اللي بيسمح للطفل بمساحة لعب بلا نهايات محددة open-ended play فيبتكر أكتر من استخدام للعبة الواحدة، فتتسّع قدرته على التخيُل والإبداع.
فهما شافوا إن كل ما كانت الألعاب من خامة الطبيعية وأقرب لأصلها، كل ما ساعدت الطفل يستوعب حاجات كتيرة حواليه، وده بالتأكيد بيساهم في نضجه وصقل شخصيته ككل!
مين استخدم مع طفله ألعاب من الطبيعة خارج تعليم المنتسوري أو والدورف ويقول لنا تجربته؟
