قصة لعبة: (لوح الاتزان المقوّس curvy balance board!)
واحد من أكتر الألعاب اللي اتطلبت عندنا السنادي، هو أداة استخدمها (شتاينر) ضمن فلسفة تعليمه المعروفة باسم (والدورف) لتدريب الأطفال على مهارة تحقيق الاتزان البدني في سن مبكرة، بالإضافة لأن بساطتها وتقويستها بتشجّع خيال الطفل على اللعب بيها بأكتر من طريقة وتعلّمه يفكّر ويستثمر الحاجات البسيطة اللي معاه.
فكرة تنفيذنا للعبة كانت اقتراح من صديق لنا -وهو أب لطفلين-، لأنها واحدة من الألعاب اللي الأطفال بيتبسطوا بيها كتير على الرغم من بساطتها.
درسنا تصميم اللعبة بحيث يكون مقوس بالدرجة اللي تسمح للطفل يستمتع وهو بيحاول يتوازن عليه، وكمان لو حب يعمل منها مرجيحة أو زحليقة.
صنّعناه يدوياً من خشب طبقات، واختبرناه على أوزان أشخاص كبار لحد 130 كيلوجرام، ولما لعبنا بيه بنفسنا لاقيناه ممتع وبيساعد على الاسترخاء!
راعينا لأمان الطفل إن كل حوافه تكون منحنية، مصقول بالسنفرة أكتر من مرة لتنعيم سطحه، ومدهون في النهاية بطبقة حماية طبيعية.
حاولنا نجدد ونضيف لمسات تانية مميزة على لوح الاتزان، فوفرنا تصميم بألوان مبهجة عليه، مع إمكانية حفر اسم الطفل أو طباعته على اللوح عشان تفضل ذكرى جميلة معاه، ويحس بتقدير إن الهدية دي علشانه مخصوص.
وكل ما بنشوف صور أو فيديو ونسمع من أهالي الأطفال تعليقاتهم عن قد إيه هم مبسوطين بيه، بنحس بالفرق اللي قدرت اللعبة دي تعمله مع أطفالنا، حتى فرقت مع الكبار! 
