Locally produced handmade toys ألعاب مصنوعة محلياً يدوياً
بنلاقي كتير من الألعاب الخشبية الموجودة في السوق المصري مستوردة، وعلى الرغم من إن جودتها مش الأفضل، بتوصلنا بأسعار مُضاعفة لتكلفة تصنيع مماثل ليها هنا
في المقابل، ارتفاع تكلفة الأخشاب في مصر -كون أغلبها مستورد- بيشكل تحدي لصناعة وبيع الألعاب الخشبية هنا بسعر معقول
خصوصا مع انتشار الألعاب المصنعة من البلاستيك واللي تكلفة تصنيعها أقل كتير
ومع التضييق مؤخراً على استيراد بعض المنتجات الترفيهية زي الألعاب… السوق بيوجد حلول بديلة مبتكرة…
زي ما شوفنا في الـ 3 سنين اللي فاتوا إزاي السوق المصري قدر يصنّع بدائل للفانوس الصيني من النحاس والخشب
لكن لحد وقتنا، فيه تحديات لتحسين جودة المنتج المحلي عشان ينافس المستورَد ويكون بديل حقيقي…
هو ده اللي بنحاول في ألواح ودسر نحققه… إننا نوجد بديل مناسب نوازن فيه بين السعر العادل (بالنسبة لتكلفة الخامات وإمكانيات الإنتاج هنا) والجودة العالية
من خلال إننا…
نجتهد في انتقاء خامات جودتها عالية (زي مثلا اختيار خشب الزان الألماني شديد الصلابة والتماسك بدل الروماني غير المُعالَج)، والاهتمام بتفاصيل التنفيذ بمعايير جودة عالية.
نحسب تكلفة المنتج بعد التصنيع بشكل محايد بغض النظر عن التسعير المنتشر في السوق من كون بعض الألعاب غالية بشكل غير مبرر لمجرد إنها تريند عليه طلب (زي ألعاب المنتسوري حاليا).
بنسعى لتطوير عملية التصنيع والقدرة الإنتاجية باستمرار، لتقديم سعر أفضل مع الوقت مع المحافظة على نفس الجودة.
عشان تلاقي لطفلك لعبة متصممة لتنمية حواسه وإدراكه ومهاراته العقلية والعضلية من ملمس طبيعي زي الخشب ومن خامات قيّمة تعيش معاه وقت طويل، وتتصمم وتتصنّع بروح الأكل البيتي المعمول هنا بإتقان ونَفَس إنها رايحة لأطفالنا ،مش جايبين لهم لعبة جاهزة من برة.
