ليه اللعب الحر مهم لطفلك؟
ليه اللعب الحر مهم لطفلك؟
يمكن معروف إن اللعب مهم جداً لحياة سوية للطفل في مراحل النمو المختلفة، ممكن نشبّه اللعب بإنه الوظيفة الرئيسية للطفل ورسالته في الحياة -أثناء مرحلة الطفولة-، واحنا الآباء (يعني الأب والأم) نقدر نشوف اللعب كنموذج محاكاة لحياة شخص مسئول عن نفسه وطريقة إدارته لحياته.
خبراء علم نفس الطفل بيعتبروا “اللعب الحر” عنصر أساسي وضروري لامتلاك مهارات اجتماعية وقدرة على التكيُّف مع الضغوط، وتطوير المهارات الإدراكية زي حل المشكلات، وبيشوفوا إن عدم وجود فرص للعب الإبداعي غير المنظم ممكن يحول دون نموهم كأشخاص بالغين سعداء في حياتهم وعندهم اتزان نفسي.
اللعب الحُر المفتوح open-ended play هو المساحة الأكبر اللي بنقدمها لهم وقت اللعب (سواء مع ألعاب toys أو الـ play الحركة والتفاعل مع أقرانه) دون قواعد محددة أو خطة مسبقة أو طريقة ما للعب، كأنه بينطلق في الحياة وبنشوف هو هيتفاعل معاها إزاي وهيكتسب منها إيه.
التطبيق العملي للنقطة دي إننا نسمح للطفل يلعب بدون قواعد أو توجيه مسبق، ويلعب بأشكال مختلفة حتى لو كانت الطريقة (جديدة وغريبة علينا)، يعني ما تلخموش نفسكم بيهم أوي.
