١٠ أفكار تعلم طفلك قيمة النقود
١٠ أفكار تعلم طفلك قيمة النقود ١- لما طفلك يتم ٤ سنين تقدري تعلميه أنواع العملات وقيمتها 💵 وساعتها تقدري تديله مصروف صغير يناسبه وتوجهيه يصرفه إزاي وممكن كمان تديله الفلوس عشان يحاسب السوبر ماركت 😃
٢- لما ييجي يختار حاجة لنفسه حطيله حدود زي مثلاً المرادي هنجيب حاجة ب ٥ جنيه بس أو ١٠ جنيه، لا دي أغلي مش هنقدر نجيبها 🤷🏻♀️
٣- عرفيه إن كل حاجة ليها قيمة، في حاجات نقدر نشريها بالفلوس وحاجات تانية لأ، زي الصحاب أو الأهل الـ بيحبونا ويخافوا علينا 😁
٤- نفهمه إن كل مبلغ بيدخره بيساعده يحصل على الحاجات الـ محتاجها أو بيحبها، بعد شوية انتظار وصبر! ⏳
٥-مهم يعرف الفرق بين الإدخار والاكتناز، وإننا مش بنحوش لمجرد إن يكون عندنا فلوس وخلاص زي عم دهب 💰😁، لكن بندّخر جزء من الفلوس عشان نستعمله وقت احتياجنا زي فكرة الجمل الـ بيوفر مخزون من الأكل والمياه في سِنامه عشان يستعملهم وقت ما يحتاج 🐫
٦-اشتريله حصالة صغيرة وحطيله فيها مبلغ تشجعيه بيه على التحويش وعلميه الفكرة منها
٧- لما يكبر شوية شجعيه يقسم مصروفه لجزء يصرفه وجزء يحوشه في الحصالة وجزء يتبرع بيه للخير. 🌱🤲🏻
٨- لما يتم ٨ سنين ممكن تعلميه إزاي يعمل ميزانية بسيطة لمصروفه، واقترحي عليه يكتب في كشكول الفلوس اللي بتبقى معاه سواء مصروف او عيديات أو مكافئات، في البداية دا هيكون صعب عليه لكن بعد كده هيفهم الفكرة ويتعود عليها لحد ما يكبر، الطريقة دي هتخليه يبص للأمور من فوق (ياه كان معايا ٢٠٠ جنيه و كلهم خصلوا علي الشيكولاتة و الشيبسي 😐)
٩- افتحيله حساب توفير باسمه وخديه معاكي للبنك، هتبقى تجربة جميلة ليه وذكرى يفتكرها لما يكبر وهتقوي ثقته بنفسة وثقته فيكي 👩👦
١٠- وأخيراً علميه إن الفلوس بتيجي بعد وقت ومجهود في الشغل، ومع ذلك الأرزاق بإيد ربنا الـ بنطلب منه كل حاجة كبيرة أو صغيرة حتى لو كانت شوية الملح الـ بنحطهم على الأكل!
احكولنا تصورات غلط عن النقود كانت عندكم وأنتم صغيرين واتغيرت لما كبرتم؟ ☺️
