حماية نسيج وألوان الخشب
(اللعبة اتخربشت وألوانها راحت!)
صحيح الألعاب الخشب مش بسهولة تتكسر زي الألعاب البلاستيكية، لكن سهل إن سطحها يتقشر بعد وقت وتظهر فيه الخدوش، كمان لو ألوان اتدلقت عليها بتثبت بسرعة، وده بيمثل تحدي شوية لأن جزء من قيمة الخشب يكمن في مظهره وشكله الجميل.
خدش أو تقشير اللعبة مرتبط بعوامل كتير، منها نوع الخشب المستخدم فيها، ومدى تعرضه للرطوبة وعوامل المناخ (زي الماية أو الشمس)، وطريقة الاستخدام (زي لو بيحتك بالأرضيات أو المعادن كتير)…
عشان كده بننصح إن الألعاب الخشبية ما تتعرضش كتير للمياة أو الرطوبة أو الشمس، ويفضل اللعب بيها على أرضيات مرنة زي الفلين أو السجاد.
بنعالج طلاء الخشب لو اتجرح أو اتقشر، بصنفرته لإخفاء وتنعيم الخدش قدر الإمكان وتسوية سطح اللعبة. ولما ألوان أو زيوت بتقع على اللعبة -والأفضل نتجنب ده- بيكون العلاج في الحالة دي هو إننا نزيل طبقة الألوان دي بمسحها بقطعة قماش مبللة في حالة لو الألوان مانشفتش. أو لو جفّت، بنمر عليها بورقة صنفرة ناعمة مرور خفيف لحد إزالة طبقة اللون، نخلي بالنا إننا بنشيل طبقة اللون بس عشان نحافظ على الخشب
وبعدين بنلونها بنفس اللون الأصلي أو بلون مختلف، بالألوان والفرشاة الموجودة في المكتبات ومصرح باستخدامها للأطفال عشان ترجع اللعبة مبهجة وناعمة تاني زي الأول.
وممكن نخلي طفلنا يشارك في العمل ده عشان يشوف قد إيه هو متعب -تصيح التلوين يعني- ومحتاج دِقة. 😄
وبكده نكون وصلنا لختام سلسلة #تحديات_التفاعل_مع_الألعاب_الخشبية نتمنى نكون قدمنا لكم معلومات جديدة ومفيدة! 😊
